Дефо Д.: Робинзон Крузо (қазақ тілінде)

Даниел Дефо — ағылшынның көрнекті жазушысы. XVIII ғасырда "Робинзон Крузо" деген атпен кітап жазып, Еуропада жаңа бір әдеби бағыттың негізін қалаған. Яғни, шытырман саяхатқа толы оқиғалардың көптеп шығуына "Робинзон Крузо" ықпал еткен. Бұл романның сюжеті өмірде болған оқиғадан алынған. 1704 жылы шотландтық Александр Селькирк есімді теңізші кеме капитанымен ерегісіп қалады. Капитан ашуланып, оны Чилидің жанындағы елеусіз бір аралға тастап кетеді. Александр сол аралда 4 жыл өмір сүреді. Бірде оны бір кеме көріп құтқарып алады. Еліне келген соң Александр бастан кешкен оқиғаларын қызықты етіп айта бастайды. Мұның әңгімесін Даниел Дефо естиді. Дефоның енді ғана жазушы ретінде танылып келе жатқан кезі еді. Ол романды "Робинзон Крузо" деп атайды. Шығарманы қызықты ету үшін XII ғасырда өмір сүрген мавритан философы ибн Туфайлдың "Хай туралы әңгімесін" пайдаланады. Бұл роман расымен де, Еуропада дүмпу туғызады. Теңізші болып, саяхаттау бүлдіршіндердің арман-мақсатына айналады. 1937 жылы "Робинзон Крузоны" А. Құлбек есімді алаш зиялысы аударған екен. Аударманы қайта теріп, өңдеп, ұсынып отырмыз.