Молдабеков Д.: Қаңтар жылы

Бұл кітап он екі айдан әлдеқайда ұзаққа созылған, қалың тұманы әлі сейіле қоймаған, ақиқаты ашылмаған, үлкен өзгеріс әкеледі деген халықтың үмітін ақтай алмаған, қайғы мен қасіретке, өкініш пен мұңға, сан сұраққа, ақтаңдаққа толы тағдырлы, тарихи жыл жайында. Жеке тұлға мен қоғам өмірі, репортаж бен очерк, күнделік пен сұхбат, көркем мәтін мен сот құжаттары араласып кеткен құрақ-құрақ романды оқып отырып, әншілері өз мәнеріне салып, әрқайсысы жан-жақтан өз әнін салған ессіз хордың дауысын естігендей боласың. Бастапқыда түсініксіз, мағынасыз болып көрінетін бұл үндерге құлақ қойсаң, Қанды қаңтар жайлы ғана емес, кейінгі жылдары болған талай оқиғаның мәнін түсіне бастайсың.