Нұрсұлтан Назарбаев : Ақыл-парасат кітабы (полная версия)

«Әлем экономикасы, саясаты, ой-жүйесі сағат сайын толқып, тұйыққа келіп тіреліп жатқан тұста, анық батыл шешім қабылдау, алған беттен қайтпау, билік шыңында жайғасқан жалғыздық атты жалмауызбен жекпе-жек айқаста күн кешу - кімге де болса оңайға соқпайтыны белгілі.
Елінің есік-терезесін ашық ұстаған, озық идеяларға құшағын ашқан Нұрсұлтан Назарбаевтың ойлау жүйесі ұшқыр, талғамы таза, еркіндік аясы кең екеніне енді ешкімнің шүбә келтірмесіне сенген.»
Роллан Сейсенбаев

Өмірдегі ақыл-парасаты, саясаттағы әдіс-амалы, басына біткен кісілік мінезі Нұрсұлтан Назарбаевты әлемдегі ең терең саясаткерлердің қатарына қосты. Туа біткен мәрт мінез, ерекше байқампаздық келбетін айқындай түскен. Әлемнің қай басшысы болса да, Қазақстан Республикасы Президентінің сырға толы бет-жүзін, байыптап айтар кемел ойын, қашанда ашық пікір таласқа атойлап шығар жанкештігі ерекше құрметтейді. Президенттің адамгершілігіне, көңілінің ақтығы мен ашықтығына күмән келтірмейді. Елбасының өзі де ешкімді алаламай, барлығына бірдей таза ықыласпен, шын пейілмен беріле сырласатынын қай-қайсы да жақсы ұғынды. Қазақ елінде ЕҚЫҰ (Еуропадағы қауіпсіздік және ынтымақтастық ұйымы) өткен тұста қазақ елі басшысының тұлғасы ерекше бой көтерді. Бұл қазақ ұлы Нұрсұлтан Назарбаевтың көрегендігінің, табандылығының, кемеңгерлігінің талассыз биіктігі болатын. Ең бастысы әлем қазақ елін мойындады. Қазақ елі тәуелсіз, бай, еркін мемлекет екенін көрсетті.
Әлем қазақ еліне алғаш рет түстей қарап, Елбасының көсемдік тұлғасын қабыл алды.