Қазақстан Республикасы мемлекеттік қызметшісінің тілдік портфелі. Қазақ тілінен білімін бағалау және өзіндік бағалау жүйесі

Мемлекеттік қызметшінің қазақ тілі бойынша портфелі - оның қазақ тілін үйренуі мен меңгеруі, қазақ тілін кәсіби, оқу, шығармашылық, басқа да салаларда қолдануы барысында жеке басының қол жеткен жетістіктерін белгілеп отыратын, мемлекеттік қызметшінің қазақ тілін үйрену, меңгеру, білу деңгейін объективтілікпен өзі де, сырттан да бағалайтын құжаттар пакеті. Мемлекеттік қызметшінің қазақ тілі портфелін қолданудың негізгі мақсаты: мемлекеттік қызметшінің қазақ тілін үйрену, меңгеру, білу барысы туралы өзіне, ортаға есеп беруі, қазақ тілін жақсы (нашар) білудің айқын «картинасын» анықтау, мемлекеттік қызметшінің қазақ тілін үйрену үдерісінің өсу (төмендеу) градациясын бақылау, мемлекеттік қызметшінің өз бетімен кәсіби тұрғыдан қазақ тілін үйренуге қажетті оқу құралдарын іздеу, таңдай білу, кеңесу, өзі ойлап табу, ұсыныс жасау тәрізді ізденімдік-танымдық табыстарының көрініс беруі. Мемлекеттік қызметшінің қазақ тілі портфелі жаңа заманға лайық білім бағалау жүйесі.