Сапарбаев М.: Бақыт

Журналист, Тележүргізуші, Халықаралық деңгейдегі коуч-маманы, жеке даму бойынша тренер Мұхит Сапарбаевтың тырнақалды «Бақыт» атты кітабы бір күннің ішінде келген жоқ өмірге. Кітап – үлкен еңбекпен, терең ізденіспен, «бір оқырманға болса да көмегім тисін» деген шын ықыласпен жазылған туынды. «Бақыттың» бүгінгі оқырманның талап-тілегіне, талғамына, дүниетанымына, сұранысына сай жазылғанын даусыз мойындайсың. Кітаптың ерекшелігі сонда.

Аты айтып тұрғандай, кітап бастан аяқ бақыттың төңірегінде өрбиді. Жер басып жүрген әрбір пенде бүкіл саналы ғұмырындабақытты болуды армандап өтеді. Бірақ өмір бойы осынау ұлы арманына жете алмайтындар аз емес. Шынтуайтына келгенде, бақыттың соңына түсіп, шарқ ұру жоқты іздеумен бірдей. Өйткені Алла Тағала бақытты әрбір адамның өзінің ішіне жасырып қойған. Былайша айтқанда, әркімнің өзінің «жекеменшік» бақыты бар. Ал іште жатқан баға жетпес байлықты қазып, қопарып, сыртқа шығару кісінің кісілігінде. Міне, кітаптың әрбір оқырман үшін ең пайдалы тұсы осында, яғни «соқырға таяқ ұстатқандай» бақытқа кенелудің төте жолын көрсетіп береді.

Әлі игерілмей жатқан шексіз «байлығын» иеленген адамның қуанышында шек болушы ма еді?! Кітап әрбір оқырманды осындай зор қуанышқа бөлейді. Мұхит Сапарбаев кітап жазуды мақсат тұтпаған, оның мақсаты – адамдарға қуаныш сыйлау.