Шаханов М.: Махаббатты қорғау

Қаншама ақын-жазушылардың елу жылдық, алпыс жылдық мерекелерінде өз ана тілінде 10-15 томдық шығармалары жарық көріп жатса, биылғы жылы жетпіске шыққан, поэзиясын ЮНЕСКО әлемдік поэзияның осызамандық жетістігі ретінде бағалаған, есімі Біріккен Ұлттар Ұйымының алтын кітабына жазылған, елімізде, көзі тірі ақындар арасында өлеңдері ең көп жатқа оқылатын ақын Мұхтар Шахановтың күні бүгінге дейін 2 том шығармасы бірігіп шықпаған екен. Елдік, ұлттық мүдде үшін арпалысып, шындығын ту еткен әрбір қаламгердің қашанда жолы мен тағдыры қиын болатынына тағы да Шаханов феномені дәлел бола алады. Сондықтан біз "Түркі тілдес халықтар арасындағы ең үздік әлем ақыны" атанған М. Шахановтың өлеңдері мен балладаларын, әндері мен поэмаларын қалың жұртшылыққа топтап ұсынуды жөн көрдік.