Магауин М : Шыңғыс хан. Т. 2

Атақты жазушы Мұхтар Мағауиннің "Шыңғыс хан" эпопеясының "Ұйысқан ұлыс" аталатын Екінші кітабын ата-баба тарихына ынтызар оқырман назарына ұсынып отырмыз. Бұл II том шын мәнісінде Шыңғыс хан тарихының Бірінші кітабы есепті, жекелей, дербес еңбек десе де болады.
Өткендегі, "Туған жұрт" аталатын бастапқы кітап - Шыңғыс ханды тудырған заман және Ұлы Даланы жайлаған ежелгі рутайпалар туралы толымды мағлұмат беретін.
Екінші кітап - Шыңғыс ханның жекелей тарихына құрылған. Хикая болашақ жихангер дүниеге келген 1155 жылдан басталып, 1218 жылмен шектеледі. Бұл екі аралықта Орталық-Шығыс Азия көлемінде әлемдік маңызы бар ғаламат оқиғалар өткен еді.
Мұхтар Мағауин ескілікті, нақты тарихи деректер негізінде Шыңғыс ханның бала кезіндегі қиын  тағдырын, одан кейінгі қайтпас күресін, қантөгіс соғыстарын және зор билікке жеткеннен соңғы заманда Таңғұт пен Қытайға қарсы жеңісті жорықтарын сыпаттайды. Шыңғыс хан және оның жасампаздық қызметті туыстас түрік халықтарының қайта өрлеуі және бүкіл әлемнің жаңғырып, қайта құрылуының бастау көзі ретінде кейіптелген. Қолыңызда - Шыңғыс ханның әлемдік тарихнамадағы ең толымды, ең шынайы ғұмырбаяны.
Қызғылықты, әсерлі хикая жастарымыздың танымы мен өрісін кеңейтіп, жасы үлкендерге тың тыныс қосады деп білеміз. Келесі кезекте - Шыңғыс ханның Хорезм жорығы сыпатталатын Үшінші кітап!