Назарбаева Ә.: Кие

Кие - тамыры терең, ауқымы кең, қастерлі ұғым. Бұл кітап менің өміріме, рухани әлеміме КИЕ боп қонған қастерлі құндылықтар жайлы.
Жан дүниеме жарығын түсіріп, көңілімнің көлеңкесін сейілткен КИЕлер мен Өмір-дастанымның әр тарауында бар.
Жаратушының менің тағдырыма таңдап бұйырған әр сынақ, әр жетістік, әр жеңісіне алғыс білдіремін, құлазыған сәттеріме де құрметпен қараймын. Мен бұл кітапта жүрегімнің төріне туын тіккен «Киелі мекендерімнің» күнгейі мен көлеңкесін ашық әңгімелеймін.
Сіздер мені аліміздің Тұңғыш Президенті Нұрсұлтан Назарбаевтың кенже қызы ретінде ғана емес, әлеуметтік және қайырымдылық жобалардың құрылтайшысы, көркем және деректі фильмдердің продюсері, көпбалалы ана ретінде де білесіздер. Бұл менің сыртқы сипатым. Ал ішкі әлеміме «өмір-ұстазымның» берген тәлім-тағылымы тұнған.
Дөңгеленген дүниенің сыры қозғалыс пен әрекетте десек, кез келген мақсатқа адам баласы әрекет ету арқылы ғана қол жеткізеді. Осы алғашқы кітабым арқылы оқырманымның «ұйықтап жатқан» армандарына ұмтылуға, өз өңменіне үңіліп, өзін-өзі тыңдай алуына себепкер болсам - менің КИЕлі мұратымның орындалғаны.
Адам болмысының шыңдалуы оның арман жолындағы талпыныс, күрес, табандылығына тікелей байланысты. Ал арман жолындағы ерліктер - қиындығымен, құрбандықтар - қимастығымен құнды. Олай болса, менің КИЕлі құндылықтарыма үңілуге шақырамын.
Бұл кітап сізге арналған.