Бахтиярқызы Ж.: Қарлығаш

«Қарлығаш» кітабында ата мен немеренің диалогы арқылы отбасы құндылықтары, ұрпақ тәрбиесі, қыз баланың қадыр-қасиеті, салт-дәстүр мен тарих, махаббат пен мейірімділік тақырыптары қозғалды. Сондай-ақ, қазақ тарихында өшпес із қалдырған аналарымыздың тағылымды тағдыры, жас отбасыларға үлгі боларлық ерлі-зайыптылардың өнегелі өмірі баяндалады. Алты алашқа аты мәлім Бәйдібек бабамыздың қыздары, Домалақ анамыз бен Төле би бабамыз сынды, Құрманғазы бабамыз бен Дина Нүрпейісова әжелеріміздің, махаббат эталонына айналған заңғар тұлға Дінмұхаммед Қонаев пен Зуһра Қонаева апамыздың өміріндегі өсиет-өнегесі көркем сөзбен өріледі. Кітап әртүрлі жастағы оқырманға арналған.

Аңдапта:
Қарлығаш есімді қаршадай қыздың үлкен тағдыр жолына бастайтын жүрегіндегі махаббат жыры, нәзік сыры, асқақ арман-ойлары «Қарлығаш (Махаббат ескерткіші)» атты хикаят-әңгіменің өзегіне айналған. Қарлығаш қыздың атасымен бөлісер балауса сезім-ойлары, келе-келе күрмеуі қиын өмір жайындағы сауалы сан мың толғаныстарға ұласады: ұлдың ұядан, қыздың қиядан қия баспас жолына серік болар сенімді сертті, отансүйгіштік сезімді ата мен бала арасындағы қарапайым диалогпен өрбіте отырып, өскелең де өрісті ойларға жетелейді. Атасы мен анасын ардақтау арқылы Алаш елін ардақтай білуге үйретеді.
Бұл хикаят махаббат жайлы ғана емес... Сырлы сезімнен бөлек тарихты да, салт-сананы да, тәлім-тәрбиені де сөз етеді, келешекке үн тастайды.
Тоқетері, «Бойтұмарың не, ой құнарың қайдан» деген сауалға жауап іздесеңіз, «Қарлығаш (Махаббат ескерткіші)» хикаят-әңгімесінен табасыз.